Os yw rhywbeth yn cael ei hysbysebu am y pris anghywir

Os yw rhywbeth yr ydych am ei brynu'n cael ei hysbysebu am y pris anghywir, efallai y gallwch ei brynu am y pris is.

Prynu mewn siop

Bydd eich hawliau cyfreithiol mewn siop yn dibynnu ar a ydych chi wedi talu am yr eitem eto ai peidio.

Os nad ydych wedi prynu’r eitem

Os byddwch chi’n mynd ag eitem i’r til ac yn cael gwybod bod y pris ar y ticed pris neu’r label yn gamgymeriad, does gennych chi ddim hawl i brynu’r eitem am y pris is. Gallech ddal gofyn i’r gwerthwr i gadw at y pris hwnnw.

Mae’r un fath os gwelwch eitem yn cael ei hysbysebu yn unrhyw le am bris is na’r un pris sydd ar y ticed.

Os ydych chi wedi’i brynu’n barod

Pe bai'r siop yn gwerthu eitem i chi am gost is nag yr oedden nhw wedi'i fwriadu, does dim rhaid i chi roi’r eitem yn ôl - dim ond os oeddech wedi siarad am y pris (e.e. £100) a'u bod wedi codi llawer llai arnoch yn y pen draw (e.e. £10) y mae ganddyn nhw hawl gyfreithiol i ofyn i chi am fwy o arian.

Os ydych chi’n sylweddoli eich bod wedi talu mwy am eitem nag yr hysbysebwyd ar y pryd, gofynnwch i’r siop ad-dalu’r gwahaniaeth rhwng yr hyn rydych chi wedi’i dalu a’r hyn a hysbysebwyd.

Cadwch unrhyw dystiolaeth o’r camgymeriad, os gallwch chi – er enghraifft, gallech dynnu llun o’r hysbyseb yn ffenestr y siop.

Siopa ar-lein

Mae eich hawliau cyfreithiol yn dibynnu ar amodau eithaf dyrys o ran y gyfraith: p’un a oes gennych ‘gontract’ ai peidio.

Yn dibynnu ar delerau ac amodau'r cwmni, bydd gennych hawliau cyfreithiol (a chontract) naill ai:

• ar ôl i chi dalu am yr eitem

• ar ôl iddyn nhw ei anfon atoch chi

Bydd angen i chi ddod o hyd i delerau ac amodau’r cwmni i gael gwybod ble rydych chi’n sefyll. Cysylltwch â’ch Gwasanaeth Cyngor ar Bopeth leol os oes arnoch angen help. Efallai y bydd yn rhy gymhleth i chi ddatrys y sefyllfa eich hun.

Os oes gennych chi gontract, ni all y cwmni fel arfer ganslo'ch archeb, hyd yn oed os ydyn nhw’n sylweddoli eu bod wedi gwerthu rhywbeth i chi am y pris anghywir.

Os nad oes gennych chi gontract a bod rhywun yn sylweddoli eu bod wedi rhoi’r pris anghywir i chi, gallan nhw ganslo eich archeb.

Os ydych chi wedi talu ffi ychwanegol i’r eitem gael ei ddanfon atoch

Os oeddech chi wedi prynu rhywbeth gan fusnes sydd wedi’i leoli y tu allan i’r DU, efallai y bydd angen i chi dalu TAW, toll dramor neu ffi danfon. Bydd y cwmni sy’n danfon eich eitem yn anfon bil atoch yn dweud wrthych beth mae angen i chi ei dalu.

Gallwch ddod o hyd i ragor o wybodaeth am ffioedd a beth i’w wneud os ydi busnes wedi codi gormod arnoch ar GOV.UK.

Rhagor o gymorth

Os oes angen rhagor o gymorth arnoch chi, cysylltwch â gwasanaeth defnyddwyr Cyngor ar Bopeth- bydd cynghorwr hyfforddedig yn gallu rhoi cyngor i chi ar-lein neu dros y ffôn.

Os ydych chi’n teimlo bod y siop yn camarwain pobl yn fwriadol, gallwch roi gwybod i Safonau Masnachol.