Edrychwch i weld a allwch gael eich arian yn ôl ar ôl i chi gael eich sgamio

Os ydych wedi talu am rywbeth ond nad yw’r peth hwnnw wedi dod i law, efallai y gallwch gael eich arian yn ôl.

Gall darparwr eich cerdyn ofyn i fanc y gwerthwr ad-dalu’r arian. ‘Chargeback’ yw’r enw ar y cynllun ad-dalu hwn.

Os bu i chi dalu â cherdyn debyd, gallwch ddefnyddio’r cynllun Chargeback, ni waeth faint o arian a dalwyd gennych.

Os bu i chi dalu â cherdyn credyd a bod yr eitem wedi costio mwy na £100 ond llai na £30,000, efallai y gallwch hawlio ad-daliad o dan y Ddeddf Credyd Defnyddwyr – ‘hawliad Adran 75’ yw’r enw ar hyn.

Os oedd yr eitem yn costio llai na £100 a’ch bod wedi talu â cherdyn credyd, ni allwch wneud hawliad Adran 75, ond gallwch ddefnyddio’r cynllun Chargeback.

Os bu i chi dalu drwy ddefnyddio arian o’ch cyfrif PayPal, dylech ddechrau anghydfod â’r gwerthwr. Gallwch ddod i wybod sut i ddechrau anghydfod drwy fynd i wefan PayPal.

Darllenwch ein cyngor ynghylch cael eich arian yn ôl os ydych wedi talu â cherdyn neu drwy PayPal.

Ers 7 Hydref 2024, mae rheolau newydd ar waith ar gyfer banciau a ‘darparwyr gwasanaethau talu’.

Mae darparwyr gwasanaethau talu yn cynnwys:

• cymdeithasau adeiladu

• cwmnïau e-arian fel Revolut – gallwch weld rhestr o gwmnïau e-arian ar wefan y Gymdeithas Arian Electronig

• darparwyr cyfrifon cynilo

Cysylltwch â’ch banc neu’ch darparwr gwasanaeth talu ar unwaith. Rhowch wybod beth sydd wedi digwydd a gofynnwch a allwch gael ad-daliad. Mae’n bwysig eich bod yn cynorthwyo’ch banc neu’ch darparwr tra mae’n ystyried eich hawliad – gwnewch yn siŵr eich bod yn darparu unrhyw wybodaeth y mae’n gofyn amdani. 

Fel arfer, dylai eich banc neu’ch darparwr gwasanaeth talu eich ad-dalu os bu i chi anfon yr arian i gyfrif yn y Deyrnas Unedig drwy’r drefn Taliadau Cyflymach neu’r drefn CHAPS.

Nid oes rhaid iddo eich ad-dalu os bu i chi ddefnyddio dull arall o dalu, fel BACS neu Swift, neu os bu i chi anfon yr arian dramor.

Os nad ydych yn sicr pa ddull talu y bu i chi ei ddefnyddio, edrychwch ar eich datganiad neu gofynnwch i’ch banc neu’ch darparwr gwasanaeth talu.

Rhaid i’ch banc eich ad-dalu hyd at £85,000. Fel arfer, dylech gael eich ad-daliad cyn pen pum diwrnod gwaith – ond gall gymryd hyd at 35 diwrnod gwaith.

Gallai eich banc neu’ch darparwr gwasanaeth talu godi ffi o £100 ac, os felly, bydd yn tynnu’r swm hwnnw o’ch ad-daliad.

Efallai na fyddwch yn cael ad-daliad os gall eich banc neu’ch darparwr gwasanaeth talu brofi:

• nad oeddech yn ddigon gofalus pan fu i chi wneud y taliad

• na fu i chi ei gynorthwyo neu ddarparu’r wybodaeth y gofynnwyd amdani tra’r oedd yn ystyried eich hawliad

Os na allwch gael eich arian yn ôl a’ch bod yn meddwl bod hyn yn annheg

Dylech ddilyn trefn gwyno swyddogol y banc. Os na chaiff eich cwyn ei datrys cyn pen wyth wythnos, neu os byddwch yn cael llythyr ymateb terfynol, gallwch fynd â’ch achos at yr Ombwdsmon Ariannol.

Dylai’ch banc neu’ch cymdeithas adeiladu ad-dalu’r arian os oedd wedi’i gofrestru o dan God y Model Ad-dalu Amodol (CRM).

Roedd y Cod hwn yn berthnasol i drafodion a wnaed rhwng 28 Mai 2019 a 6 Hydref 2024. Ewch i wefan y Bwrdd Safonau Benthyca i weld a oedd eich banc wedi’i gofrestru o dan y Cod CRM. 

Cysylltwch â’ch banc neu gymdeithas adeiladu ar unwaith. Rhowch wybod iddo beth sydd wedi digwydd a gofynnwch a allwch gael ad-daliad o dan y Cod CRM.

Os na allwch gael eich arian yn ôl a’ch bod yn meddwl bod hyn yn annheg

Dylech ddilyn trefn gwyno swyddogol y banc. Os na chaiff eich cwyn ei datrys cyn pen wyth wythnos, neu os byddwch yn cael llythyr ymateb terfynol, gallwch fynd â’ch achos at yr Ombwdsmon Ariannol.

Dylai fod modd i chi gael ad-daliad llawn o dan y Warant Debyd Uniongyrchol. Gallwch ddod i wybod am y Warant Debyd Uniongyrchol drwy fynd i’r wefan Debyd Uniongyrchol.

Os na allwch gael eich arian yn ôl a’ch bod yn meddwl bod hyn yn annheg

Dylech ddilyn trefn gwyno swyddogol y banc. Os na chaiff eich cwyn ei datrys cyn pen wyth wythnos, neu os byddwch yn cael llythyr ymateb terfynol, gallwch fynd â’ch achos at yr Ombwdsmon Ariannol.

Nid yw’n debygol y bydd modd i chi gael eich arian yn ôl os bu i chi dalu drwy wasanaeth trosglwyddo arian, fel MoneyGram, PayPoint neu Western Union.

Hyd yn oed os na allwch gael eich arian yn ôl, mae pethau eraill y gallwch eu gwneud – fel rhoi gwybod am y sgam a chael cymorth ariannol neu emosiynol.

Mae pethau y gallwch eu gwneud i’ch diogelu eich hun os bydd angen i chi ddefnyddio gwasanaeth trosglwyddo arian eto yn y dyfodol.

Dylech:

• anfon arian at rywun rydych chi’n ei adnabod yn unig

• dewis cyfrinair sy’n anodd ei ddyfalu, a pheidio â’i rannu ag eraill

Nid yw’n debygol y byddwch yn cael eich arian yn ôl os bu i chi ddefnyddio talebau neu gardiau rhodd i dalu’r sgamiwr.

I’ch diogelu eich hun yn y dyfodol, peidiwch byth â rhoi’r rhifau ar gefn cerdyn rhodd na thaleb i unrhyw un nad ydych yn ei adnabod.