Os byddwch chi’n cael anaf oherwydd damwain yn y gwaith

Bydd cael cofnodion o’ch damwain yn ddefnyddiol os byddwch chi’n hawlio iawndal neu os bydd angen i chi hawlio budd-daliadau, gan gynnwys Tâl Salwch Statudol.

Gallwch chi gofnodi eich damwain drwy roi gwybod amdani yn y gwaith a gweld meddyg.

Mae hefyd yn syniad da:

• tynnu lluniau o'ch anaf a beth bynnag a achosodd eich damwain

• sicrhau bod gennych chi fanylion cyswllt unrhyw un a welodd eich damwain

• gwneud nodiadau am eich damwain cyn gynted â phosibl - gallwch chi gynnwys lluniau os byddan nhw’n helpu i ddangos beth ddigwyddodd

• gofyn i unrhyw dystion wneud nodiadau a'u rhannu gyda chi

Rhoi gwybod am ddamwain yn y gwaith

Mae pwy rydych chi'n rhoi gwybod iddo am eich damwain yn dibynnu ar y canlynol:

• ble roeddech chi’n gweithio pan gawsoch chi’r ddamwain

• eich 'statws cyflogaeth' - mae hyn yn golygu a ydych yn gyflogai, yn weithiwr neu'n hunangyflogedig

Gallwch chi wirio eich statws cyflogaeth ar GOV.UK.

Gallwch chi ofyn i rywun arall roi gwybod am eich damwain ar eich rhan, os na allwch chi wneud hynny eich hun.

Cofnodi eich damwain mewn llyfr damweiniau

Os oes gan y cwmni neu’r sefydliad y gwnaethoch chi roi gwybod iddo am eich damwain fwy na 10 o weithwyr, rhaid iddyn nhw ei chofnodi mewn llyfr damweiniau. Mae’n syniad da gwneud yn siŵr ei fod wedi cael ei wneud – gallwch chi ofyn i’ch rheolwr wneud yn siŵr.

Efallai y bydd gan sefydliadau llai lyfr damweiniau hefyd, felly mae'n werth gofyn a oes modd cofnodi eich damwain.

Os nad oes llyfr damweiniau, ysgrifennwch fanylion y ddamwain a'i hanfon at eich rheolwr neu'r person rydych chi’n adrodd iddo. Cadwch gopi i chi eich hun.

Gweld doctor

Mae'n syniad da gwneud apwyntiad i weld eich meddyg teulu cyn gynted â phosibl. Gallan nhw gofnodi manylion eich damwain yn eich cofnodion meddygol, yn ogystal â thrin eich anaf.

Os oes angen i chi weld meddyg ar unwaith, gallwch chi ddod o hyd i'ch gwasanaethau gofal brys lleol ar wefan y GIG.

Edrychwch ar eich contract i weld a oes rhaid i’ch cyflogwr roi amser o'r gwaith gyda thâl i chi ar gyfer eich apwyntiad - darllenwch fwy am amser o'r gwaith i ymweld â'r meddyg.

Cael tâl a budd-daliadau os na allwch chi weithio

Edrychwch ar eich contract cyflogaeth i weld:

• os gallwch chi gael 'tâl salwch cytundebol' gan eich cyflogwr

• os oes gennych chi fynediad at linell gymorth i weithwyr neu ofal meddygol

Os nad ydych wedi cael contract neu os nad yw'n sôn am dâl salwch, gofynnwch i'ch rheolwr, neu edrychwch yn eich llawlyfr staff neu ar y fewnrwyd.

Os ydych chi'n gyflogai neu'n weithiwr asiantaeth, mae’n bosibl y byddwch chi’n cael Tâl Salwch Statudol am hyd at 28 wythnos - gweld a oes gennych chi hawl i gael Tâl Salwch Statudol.

Os na fyddwch chi'n gallu cael Tâl Salwch Statudol efallai y byddwch chi’n gallu hawlio Credyd Cynhwysol neu fudd-dal arall - darllenwch fwy am gael arian pan fyddwch chi'n absennol o’r gwaith oherwydd salwch.

IOs byddwch chi’n mynd yn sâl neu’n cael eich anafu yn y gwaith efallai y byddwch chi’n gallu hawlio Budd-dal Anabledd Anafiadau Diwydiannol - darllenwch fwy am gael budd-daliadau os ydych chi’n sâl neu wedi cael eich anafu yn y gwaith.

Os ydych chi'n hunangyflogedig a bod gennych chi yswiriant diogelu incwm, gallwch chi wneud hawliad. Os nad oes gennych chi yswiriant, gallwch chi weld pa fudd-daliadau y gallwch chi eu cael.  

Gwneud hawliad am anaf personol

Efallai y byddwch chi eisiau hawlio iawndal am eich anaf os ydych chi’n credu mai eich cyflogwr neu'ch cleient sydd ar fai - er y gall hyn fod yn gymhleth a chymryd amser hir.

Os ydych chi'n aelod o undeb llafur, cysylltwch â'ch cynrychiolydd lleol neu edrychwch ar eu gwefan i weld sut mae cysylltu â nhw. Byddant nhw’n eich helpu i benderfynu beth i'w wneud ac efallai y gallan nhw ddod i gyfarfodydd gyda'ch cyflogwr i'ch cefnogi.

Mae'n well cael cyngor cyfreithiol cyn gynted â phosibl os ydych chi eisiau gwneud hawliad, oherwydd mae terfynau amser. Gweld sut i gael cyngor cyfreithiol ynglŷn â hawlio iawndal am anaf.