Cael statws mewnfudo ar-lein (eFisa)

Dylech wirio a allwch gael tystiolaeth ar-lein o'ch statws mewnfudo - a elwir hefyd yn 'eFisa'. 

Mae'r rhan fwyaf o ddogfennau mewnfudo materol wedi cael eu disodli gan eFisâu. Mae hyn yn cynnwys:

• trwyddedau preswylio biometrig (BRPau)

• cardiau preswylio biometrig (BRCau)

• stampiau mewn pasbortau

• sticeri 'vignette' mewn pasbortau

• frontier permits

Mae cael eFisa am ddim ac ni fydd yn newid eich caniatâd i fyw yn y DU.

Bydd angen i chi greu cyfrif Fisâu a Mewnfudo'r DU (UKVI) i gael mynediad at eich eFisa.

Dylech greu cyfrif ar gyfer pob person sydd â chaniatâd i aros yn y DU - mae hyn yn cynnwys eich plant a'ch dibynyddion.

Os daeth eich trwydded breswylio biometrig i ben ar 31 Rhagfyr 2024

Roedd gan y rhan fwyaf o drwyddedau preswylio biometrig (BRPau) ddyddiad dod i ben o 31 Rhagfyr 2024 - oherwydd bod eFisâu yn disodli BRPau. Nid yw hyn yn golygu bod eich fisa wedi dod i ben ar y dyddiad hwn.

Dylech greu cyfrif UKVI ar gyfer eich eFisa cyn gynted â phosibl. 

Os nad ydych chi'n siŵr pryd mae eich fisa yn dod i ben, gallwch wirio'r llythyr a gawsoch gan y Swyddfa Gartref pan wnaethon nhw gymeradwyo eich cais.

Os ydych yn parhau i fethu a dod o hyd i ba bryd y daw eich fisa i ben siaradwch â chynghorydd.

Fideo gan y Swyddfa Gartref - beth yw eFisa?

Pryd y cewch chi statws mewnfudo ar-lein

Mae pryd y byddwch chi'n cael eFisa yn dibynnu ar eich sefyllfa.

Os oes gennych gyfrif ar-lein eisoes

Nid oes angen i chi greu cyfrif UKVI os oes gennych chi un eisoes.

Bydd angen i chi gysylltu eich eFisa â'r cyfrif.

Efallai bod gennych gyfrif UKVI eisoes os ydych chi wedi gwneud cais am:

• statws preswylydd cyn-sefydlog neu sefydlog o Gynllun Preswylio'r UE

• fisa myfyriwr

• fisa Gwladolyn Prydeinig (Tramor) - ac rydych chi o Hong Kong

Bydd angen yr ap ‘UK Immigration: ID Check’ arnoch i gadarnhau eich hunaniaeth ac ychwanegu eich eFisa at y cyfrif.

Os na allwch gael mynediad i'ch cyfrif  

Gallwch gael help i'w adfer. Bydd angen i chi gael mynediad at y rhif ffôn a'r cyfeiriad e-bost a ddefnyddiwyd i greu eich cyfrif. Gwiriwch sut i adfer eich cyfrif UKVI ar GOV.UK.

Creu cyfrif ar-lein

Bydd angen i chi greu cyfrif Fisâu a Mewnfudo'r DU (UKVI) i gael statws mewnfudo ar-lein. 

Byddwch chi’n gallu defnyddio’ch cyfrif UKVI i:

• gweld a phrofi eich statws ar-lein

• gwirio pa hawliau sydd gennych yn y DU

• diweddaru eich manylion personol - fel eich gwybodaeth gyswllt

I greu eich cyfrif, bydd angen i chi lawrlwytho'r ap 'UK Immigration: ID Check' ar ffôn. Mae hyn er mwyn i'r Swyddfa Gartref allu cadarnhau eich hunaniaeth.

Bydd angen mynediad at gyfeiriad e-bost arnoch hefyd fel y gall y Swyddfa Gartref anfon y wybodaeth ddiweddaraf atoch.

Os ydych chi eisoes wedi profi eich hunaniaeth mewn Canolfan Ymgeisio am Fisa neu Ganolfan Cymorth Gwasanaeth, mae angen i chi greu cyfrif UKVI o hyd.

Creu cyfrif UKVI ar GOV.UK.

Gallwch wirio sut i lawrlwytho ap Mewnfudo'r DU: Gwirio ID ar GOV.UK.

Sganio dogfennau adnabod

I greu cyfrif UKVI, fel arfer bydd angen i chi ddefnyddio'r ap i sganio naill ai cerdyn BRP neu basbort cyfredol. Os cewch drafferth i wneud hyn, gallwch chi nodi'r manylion o'r dogfennau yn lle hynny.

Mae'n werth defnyddio'ch pasbort i greu'r cyfrif os gallwch chi. Mae hyn yn golygu mai dim ond pan fyddwch chi'n dod i mewn i'r DU y bydd angen i chi ddangos eich pasbort.

Os ydych chi'n ffoadur, ni allwch ddefnyddio pasbort o'ch gwlad gartref. Gallwch ddefnyddio cerdyn BRP neu basbort gwahanol.

Os ydych chi am ddefnyddio cerdyn BRP, rhaid iddo fod wedi dod i ben yn ystod y flwyddyn ddiwethaf.

Os ydych chi eisiau defnyddio pasbort cyfredol, bydd angen rhif cyfeirnod arnoch chi hefyd. Bydd arnoch angen naill ai:

• rhif BRP - os cafodd eich BRP ei golli neu ei ddwyn, gallwch ddefnyddio'r rhif o hyd os ydych chi'n gwybod beth ydyw

• eich rhif cyfeirnod Swyddfa Gartref - weithiau gelwir hwn yn 'rhif cais unigryw' (UAN) neu'n rif 'ffurflen we fyd-eang' (GWF)

Efallai y byddwch yn dod o hyd i'ch rhif cyfeirnod ar lythyrau neu e-byst gan y Swyddfa Gartref ynglŷn â'ch cais diweddaraf am fisa.

Os oes angen help arnoch i greu cyfrif

Gallwch ofyn i rywun rydych chi'n ymddiried ynddo eich helpu i sefydlu'r cyfrif - fel ffrind neu aelod o'r teulu. Byddwch chi'n cael e-bost gyda dolen i'ch cyfrif.

Mae'r Swyddfa Gartref wedi trefnu i rai sefydliadau helpu pobl a allai gael trafferth sefydlu cyfrif. Mae'n werth cysylltu â nhw os, er enghraifft:

• rydych chi'n sâl neu'n anabl

• rydych chi'n cael trafferth gyda siarad Saesneg

• rydych chi'n ddigartref 

Gwiriwch pa sefydliad all eich helpu i sefydlu cyfrif ar GOV.UK.

Os na allwch reoli eich cyfrif eich hun, gallwch ychwanegu rhywun at eich cyfrif a all wneud hynny ar eich rhan - a elwir yn 'ddirprwy'. Er enghraifft, efallai y bydd angen dirprwy arnoch os ydych chi'n blentyn neu os oes gennych anabledd sy'n golygu na allwch ei wneud eich hun. Gallwch dynnu dirprwy o'ch cyfrif unrhyw bryd.

Os ydych chi'n ddirprwy ac yn rheoli cyfrif ar gyfer plentyn, gallwch drosglwyddo rheolaeth iddyn nhw pan fyddan nhw'n barod i reoli'r cyfrif. Bydd angen i chi newid y cyfeiriad e-bost a'r rhif ffôn ar y cyfrif.

Os oes angen help arnoch o hyd i greu cyfrif UKVI, siaradwch â chynghorydd.

Os oes angen help arnoch i ddefnyddio cyfrifiadur neu ddyfais symudol

Gallwch gael help gan wasanaeth digidol â chymorth y Swyddfa Gartref os ydych chi:

• ddim yn hyderus wrth ddefnyddio dyfais symudol neu gyfrifiadur

• heb fynediad at ddyfais symudol na chyfrifiadur

• heb fynediad i’r rhyngrwyd

Darperir y gwasanaeth gan We Are Group.

Gallan nhw eich helpu dros y ffôn. Efallai y byddwch yn gallu ymweld â rhywun neu efallai y byddan nhw’n gallu ymweld â chi gartref - bydd hyn yn dibynnu ar ble rydych chi’n byw. Mae rhagor o wybodaeth ar gael am sut mae cael help gan We Are Group ar GOV.UK.

We Are Group

Ffôn: 0333 344 5675 (dydd Llun i ddydd Gwener rhwng 9am a 6pm)

Testun: 07537 416 944 - tecstiwch y gair VISA

Ffôn testun (gan ddefnyddio Testun y Genhedlaeth Nesaf): 18001 0333 344 5675

E-bost: visa@we-are-digital.co.uk

Mae eich galwad yn debygol o fod am ddim os oes gennych chi gytundeb ffôn sy'n cynnwys galwadau am ddim i linellau tir - dysgwch fwy am ffonio rhifau 030.

Os nad oes gennych fynediad i'r rhyngrwyd

Gallwch ddefnyddio’r rhyngrwyd yn rhad ac am ddim yn:

• eich cyngor lleol - dewch o hyd i'ch cyngor lleol ar GOV.UK

• eich llyfrgell leol - dewch o hyd i'ch llyfrgell leol ar GOV.UK

Ar ôl i chi wneud cais

Os na allwch weld eich eFisa ar unwaith, peidiwch â phoeni - bydd y Swyddfa Gartref yn anfon e-bost atoch pan fydd yn barod i'w weld yn eich cyfrif UKVI. Fel arfer, mae hyn yn cymryd 2 i 3 diwrnod - ond gall gymryd hyd at 8 wythnos.

Tra byddwch chi'n aros i'ch eFisa fod yn barod, gallwch ddefnyddio'ch pasbort a'ch BRP sydd wedi dod i ben ar gyfer teithio tan 1 Mehefin 2025.

Gallwch hefyd ddefnyddio eich BRP i gael codau rhannu i brofi eich hawl i weithio. Gallwch wneud hyn cyhyd â bod gennych ganiatâd i aros yn y DU o hyd.

Dylech gadw eich BRP sydd wedi dod i ben ar ôl i chi gael eFisa. Gallai ei gwneud hi'n haws i wneud cais am fisâu yn y dyfodol.

Profi eich hawliau yn y DU

Pan fyddwch chi'n gwneud cais am swydd, bydd angen i chi roi cod rhannu i'ch cyflogwr newydd - bydd hyn yn dangos bod gennych chi'r hawl i weithio. Cael cod rhannu ar gyfer eich cyflogwr ar GOV.UK.

Efallai y bydd angen i chi roi cod rhannu i sefydliad arall, er enghraifft banc neu gymdeithas adeiladu, pan fyddwch chi'n sefydlu cyfrif. Efallai yr hoffech chi hefyd roi cod rhannu i gynghorydd fel y gallant wirio'ch statws mewnfudo. Cael cod rhannu cyffredinol ar GOV.UK.

Gallwch barhau i ddefnyddio'ch BRP sydd wedi dod i ben i gael cod rhannu tan ddiwedd 2025 - cyn belled â bod eich fisa yn dal yn ddilys.

Dim ond am 90 diwrnod y mae eich cod rhannu yn ddilys - os na chaiff ei ddefnyddio o fewn y 90 diwrnod bydd angen i chi gael un newydd.

Nid oes angen cod rhannu ar rai sefydliadau oherwydd byddant yn gwirio eich statws mewnfudo gyda'r Swyddfa Gartref yn uniongyrchol. Nid oes angen cod rhannu arnoch i:

• hawlio budd-daliadau 

• cael triniaeth ysbyty

• cael cymorth gan eich cyngor lleol

Profi eich hawl i ddod i mewn i'r DU

Mae'n bwysig creu eich cyfrif UKVI cyn i chi deithio.

Os oes gennych chi basbort y gallwch chi ei ddefnyddio i deithio, dylech chi hefyd sicrhau ei fod wedi'i gysylltu â'ch eFisa cyn i chi archebu'ch taith.

Os ydych chi'n ffoadur, ni allwch ddefnyddio pasbort o'ch gwlad gartref.

Gallwch wirio eich dogfennau cysylltiedig ar eich cyfrif UKVI. Mewngofnodwch i'ch cyfrif UKVI ar GOV.UK.

Pan fyddwch chi'n archebu eich taith neu'n cofrestru, bydd yn rhaid i chi roi manylion eich pasbort neu'ch BRP sydd wedi dod i ben. Bydd y cwmni hedfan, gweithredwr y fferi neu Eurostar yn gwirio bod eich dogfen wedi'i chysylltu ag eFisa.

Efallai y bydd angen i chi ddangos bod gennych eFisa o hyd os oes rhaid i chi newid awyrennau neu fferïau mewn gwlad arall yn ystod eich taith. Gwnewch yn siŵr y gallwch fewngofnodi i'ch cyfrif UKVI a dangos eich eFisa. Efallai yr hoffech hefyd argraffu sgrinlun o'ch eFisa i'w gludo gyda chi.

Mae'r system hon yn dal yn newydd iawn. Ar hyn o bryd, mae'n werth mynd â phrawf bod gennych eFisa gyda chi pan fyddwch chi'n teithio. Er enghraifft, gallwch chi:

• gwirio y byddwch yn gallu mewngofnodi i'ch cyfrif UKVI a dangos eich eFisa yn ystod eich taith

• argraffu sgrinlun o'ch eFisa i'w gymryd gyda chi

• mynd â chod rhannu gyda chi - cael cod rhannu gan GOV.UK

Os oes gennych chi BRP sydd wedi dod i ben, mae'n dal yn werth mynd â hi gyda chi pan fyddwch chi'n teithio. Os yw wedi dod i ben ar neu ar ôl 31 Rhagfyr 2024, dylai cwmnïau hedfan, gweithredwyr fferi a'r Eurostar ei derbyn o hyd tan 1 Mehefin 2025.

Os ydych chi'n ffoadur neu os oes gennych chi amddiffyniad dyngarol

Efallai nad oes gennych basbort na BRP y gallwch ei ddefnyddio i deithio.

Os oes gennych ddogfen faterol arall sy'n dangos eich hawl i ddod i mewn i'r DU, dylech roi manylion y ddogfen hon pan fyddwch yn cofrestru. Nid yw wedi'i chysylltu â'ch eFisa, ond dylai'r cwmni hedfan, gweithredwr y fferi neu Eurostar allu gwirio'ch statws o hyd.

Os nad oes gennych ddogfen gorfforol, bydd angen i chi roi cod rhannu iddyn nhw. Cael cod rhannu cyffredinol ar GOV.UK. Dylech hefyd sicrhau y gallwch fewngofnodi i'ch cyfrif UKVI a dangos eich eFisa iddyn nhw. Efallai yr hoffech hefyd argraffu sgrinlun o'ch eFisa i'w gludo gyda chi - gallai hyn helpu os ydych chi'n cael trafferth mewngofnodi.

Diweddaru eich cyfrif UKVI

Pwysig

Gwnewch yn siŵr eich bod yn cadw eich cyfrif yn gyfredol

Os nad ydych chi'n cadw manylion eich cyfrif yn gyfredol, efallai na chewch chi fynd i'r DU.

Bydd angen i chi ddiweddaru eich cyfrif UKVI os:

• rydych chi'n adnewyddu neu'n disodli'r ddogfen adnabod a ddefnyddiwyd gennych i wneud cais - er enghraifft, os yw'ch pasbort yn dod i ben

• rydych chi'n newid eich enw - er enghraifft, os ydych chi'n priodi 

• rydych chi'n newid eich cyfeiriad, rhif ffôn neu gyfeiriad e-bost - mae angen i'ch manylion cyswllt fod yn gyfredol er mwyn i chi allu gweld neu rannu eich statws

• rydych chi eisiau newid eich dogfen adnabod neu ychwanegu un arall - mae hyn yn cynnwys ychwanegu ail basbort os ydych chi'n ddinesydd o 2 wlad

Os ydych chi'n diweddaru eich enw, cenedligrwydd neu ddyddiad geni, bydd angen dogfen arnoch chi sy'n profi'r newid - er enghraifft pasbort. Fel arfer, bydd yn rhaid i chi sganio'r ddogfen neu dynnu llun a'i hanfon gan ddefnyddio'r ap.

Os gwnaethoch chi ddefnyddio'ch BRP i greu'ch cyfrif UKVI

Mae'n werth ychwanegu eich pasbort at y cyfrif. Mae hyn yn golygu mai dim ond pan fyddwch chi'n dod i mewn i'r DU y bydd angen i chi ddangos eich pasbort.

Gallwch hefyd ychwanegu neu newid eich dogfen adnabod gan ddefnyddio eich cyfrif UKVI.

Bydd yn rhaid aros nifer o wythnosau cyn y gallwch fewngofnodi gyda manylion eich dogfen adnabod newydd - gwnewch yn siŵr eich bod yn cadw manylion eich hen un tan hynny. 

Pan fyddwch chi'n ychwanegu dogfen adnabod newydd at eich cyfrif, bydd angen i chi fewngofnodi gan ddefnyddio'r ddogfen adnabod honno yn y dyfodol.

Peidiwch â phoeni os na allwch weld eich hen ddogfen adnabod ar eich cyfrif. Mae yno o hyd, ond efallai mai dim ond yr un ddiweddaraf rydych chi wedi'i hychwanegu y bydd y system yn ei ddangos.

Gallwch ddiweddaru eich manylion yn eich cyfrif UKVI ar GOV.UK.

Os na chewch gadarnhad ar ôl i chi ddiweddaru eich cyfrif, neu os ydych chi wedi bod yn aros am fwy na 4 wythnos, cysylltwch â chanolfan gyswllt Fisâu a Mewnfudo'r DU.

Os oes gennych chi broblemau gyda'ch eFisa

Os oes angen help arnoch i sefydlu eich cyfrif UKVI, gallwch ofyn i'r Swyddfa Gartref am gymorth gan ddefnyddio sgwrs we ar GOV.UK.

Os yw eich manylion yn anghywir ar eich eFisa, neu os defnyddiodd y Swyddfa Gartref y manylion cyswllt anghywir wrth sefydlu eich cyfrif UKVI, gallwch roi gwybod am wall gyda'ch eFisa ar GOV.UK.

Os oes angen help arnoch i ddefnyddio ap ‘UK Immigration: ID Check’, rhannu eich statws neu ddiweddaru eich manylion, cysylltwch â chanolfan gyswllt Fisâu a Mewnfudo'r DU.